വഴികൾ

വഴികളങ്ങനെ

പടർന്നു വലുതാവുന്നതാണ്

ഇന്നത്തെപ്പാട്ട്

സൂക്ഷിച്ചു വെച്ച ഒരു പാത്രമുണ്ട്

പൂക്കളുടെ ചിത്രമുള്ളത്

അതിലാണ് നിറയെ വളപ്പൊട്ടുകൾ

പഴയൊരു പെരുമഴക്കാലത്ത്

പ്രണയാധികാരപ്രയോഗാൽ

പൊട്ടിച്ചെടുത്തതാണ്

ആ ചുവന്ന വളപ്പൊട്ടുകൾ

ചോര പൊടിഞ്ഞിരുന്നു

നോക്കി നോക്കിയിരിക്കേ

അവൾതന്നെയായും മാറിയിരുന്നു

എപ്പോഴോ ഈ പാത്രത്തിലായി,

ചൂട്ടുവെളിച്ചത്തിൽത്തുടുത്ത ആ മുഖവും

തെളിഞ്ഞു കണ്ട വഴിയൊക്കെയും …

അവൾ

ഞാൻ നടന്നു വന്ന വഴിയാണ്.

നടന്നിങ്ങെത്തുമ്പോൾ

വഴിയൊരു വളപ്പൊട്ടാകും

അങ്ങനെയെടുത്തിട്ട വഴിപ്പൊട്ടുകളാണ്

ഈ പുള്ളിപ്പാത്രമാകെ

വഴികളുടെ ഈ പൂപ്പാത്രവും

ഒരു വളപ്പൊട്ടാകും

ഞാനുമൊരു പൊട്ടാകും

പൊട്ടക്കവിതയാകും….

പ്രണയത്താലെന്നാലും

വീണ്ടുംവീണ്ടും പൊട്ടിച്ചെടുത്തേ തീരൂ

പുതുവഴികൾ