നഗരത്തിന്റെ ഓർമ്മകൾ

എനിക്കു നന്നായി മനസ്സിലാകുന്ന
ഒരു ഹൃദയമുണ്ടായിരുന്നു,
എന്റെ മുഖം തെളിഞ്ഞുകാണുന്ന ഒന്ന്.
ഈ നഗരത്തിന്റെ
ഓർമ്മകളിലെവിടെയോ ആണത് നഷ്ടപ്പെട്ടത്
ഇവിടെത്തന്നെ അതുണ്ടാകുമെന്നും
എനിക്കുറപ്പുണ്ട്
കാരണം
ഇവിടെയാണ്
ഞങ്ങളുടെ കൗമാരത്തെ അഴിച്ചുവെച്ചത്
ഓർമ്മകളെ
അക്കങ്ങളായി സൂക്ഷിച്ചിരുന്നു.
ജീവിതത്തിന്റെ ചതുരംഗപ്പലകയിൽ
ഇടയ്ക്കെപ്പൊഴോ
പൂജ്യംകൊണ്ടൊന്ന് പെരുക്കിപ്പോയി
പിന്നെച്ചെയ്ത ക്രിയകൾക്കെല്ലാം
ഉത്തരം പൂജ്യം
ഇനി
നഗരത്തിന്റെ പച്ചവെയിലിൽ
പൊടിയിൽ
മഴനനഞ്ഞ നിലാവിൽ
വെളിച്ചം മുറിവേല്പിച്ച സന്ധ്യയിൽ
പരതണം
പഴയ അക്കങ്ങൾ
തെളിഞ്ഞ ആ ഹൃദയം

തെളിവ്

ഇക്കൊല്ലം
എന്റെ കുട കളഞ്ഞു പോയില്ല

സ്വപ്നങ്ങളിൽനിന്ന്
സ്വപ്നങ്ങളിലേക്ക് ഊഞ്ഞാലാടുന്ന
ഞാൻ
മരിച്ചു എന്നതിന്
ഒന്നാംതരം തെളിവ്

ഗോമതേശ്വരനോടൊപ്പം

കുറച്ചുകാലമായുള്ള ആഗ്രഹമായിരുന്നു, കർണാടക ഗ്രാമങ്ങളിലൂടെ ഒരു യാത്ര.  കഴിഞ്ഞ അവധിക്കാലത്ത് ഏതാനും കൂട്ടുകാരോടൊപ്പം മാനന്തവാടി, ബാവൊലി, എച്ച്. ഡി. കോട്ട, ആലനഹള്ളി വഴി ഒരു യാത്ര നടത്തി.  കൃത്യമായ പ്ലാനും പദ്ധതിയുമില്ലാതെ നടത്തിയ ആ യാത്രയിൽ ശ്രാവണബലഗൊള, ഹളെബിഡു, ബേലൂർ എന്നിവിടങ്ങൾ സന്ദർശിച്ചു.  ശ്രാവണബലഗൊളയുടെ വിശേഷങ്ങൾ  ഗോമതേശ്വരനോടൊപ്പം എന്ന കുറിപ്പിൽ വായിക്കാം